Tomás Rufo triunfa na Feira da Peregrina onde o balcón de autoridades tivo a dous presidentes tras anos baleiro
Esta é unha crónica taurina, vaia por diante, non unha crónica política. Condición de inicio para facer alusión a unha circunstancia que non é baladí para a tauromaquia en Pontevedra. Desde hai anos o balcón de autoridades estivo orfo de ocupantes; eran os tempos os de Rajoy acudindo sen fallo á Feira da Peregrina.
E este domingo 11 rompeu o refacho. Dous presidentes: o da Xunta, Alfonso Rueda e o da Deputación, Luis López, deron ese 'pasiño pa'diante' e sumáronse á afección presente. Como dixo Armstrong, un pequeno paso para o home pero un gran paso para a humanidade. Esaxerado, si, pero entendamos a metáfora.
Feita a observación, pasemos á lea, no mellor sentido da palabra. O toledano Tomás Rufo gañou enteiros na súa adopción pontevedresa. Certo que foi o máis afortunado no sorteo de lotes, pero é imposible negar que o puxese todo pola súa parte. Tres orellas para saír aos ombreiros no peche de feira. A punto estivo de acompañalo Daniel Luque a quen un 'metisaca' (mete e saca) vetoulle esa saída. Cortou unha orella do mesmo xeito que Morante de la Puebla, quen tivo que afrontar o peor do encierro de Alcurrucén.
Primeiro da tarde: Morante de la Puebla (ouro vello e ouro), Sucesor e Coplito (sobrero)
"Na miña vida ví isto en Pontevedra", dicían dous avezados afeccionados de barreira. "Unha vergüeza" lía nunha mensaxe por wasap. Eran as 19.07 horas da tarde cando saíu Sucesor de chiqueros, dando tumbos. E ao instante esborrallouse. De alí saíu coa cabeza por diante tras un bochornoso episodio da cuadrilla de Morante para darlle boleto.
Volta a empezar, nunca mellor dito. Coplito, primeiro sobrero, era un mansurrón de forzas contadas. Abanto de saída, requiriu tempo para entrar nas verónicas do de la Puebla. Morante sacou repertorio da muleta con pases cadenciosos e con fondura, cando a falta de percorrido do animal permitíallo. Tres cuartos de aceiro. Petición e concesión de orella.
Segundo da tarde: Daniel Luque (grana e ouro) e Gaitero
Gaitero era vesgo de encornadura. E de saída característica entre os do seu ferro, que rompeu en varas. O de Gerena sacoullo aos medios, con tento para levalo co engano a media altura. Aplaudido co toureo en redondo mentres o seu banderilleiro Juan Contreras dicíalle desde o burladero "imos os toureiros güenos!". Seguiu cunha quenda de naturais de intachable factura para pechar coa súa marca: as luquesinas. Faena de total trasmisión aos tendidos. Todo estaba predisposto para desorejar ao de Alcurrucén, pero quixo corrixir a estocada nun 'metisaca' (mete e saca) que lle privaría instantes despois dunha estocada fulminante, da segunda orella.
Terceiro da tarde: Tomás Rufo (azul cobalto, blanco e ouro) e Chalinito
Tomás Rufo estivo moi por encima de Chalinito desde que o freou nos primeiros recibos de capote. Iniciou o último terzo de xeonllos, en redondo, obrigado a recompoñerse pola caída de mans do animal. Fundamentou a faena sobre a man dereita, obrigado aos toques continuos para que o castiñeiro pasase pola muleta; ata que se plantou sen trastes na súa mesma cara. Acertou coa suprema. Petición de orellas nos tendidos. Dous apéndices que lle aseguraron a porta grande. Sergio Blasco, Andrés Revolta e Fernando Sánchez, banderilleiros do de Pepino, mereceron saír a saudar pola súa brillante intervención.
Cuarto da tarde: Morante de la Puebla e Gaita
Como apuntou Bergamín, o toureo faise e dise. Cando Morante non pode facer toureo, non fai falta que o diga. Sábese, sen concesións vai en busca do aceiro. Gaita era imposible, complicado ata de colocar. Así que aquel de o "Morante arrímate!" estaba a pedir rápida resposta: baixa e ponte ti. Porque mansazo era o cuatreño e perigoso polo pitón esquerdo tamén. Fin da cita, ou da faena.
Quinto da tarde: Daniel Luque e Martinete
Martinete saíu ao rodo rompendo a dinámica dos seus predecesores e recibido con lances á verónica por Luque. Parecía rehuir ao picador, que fixo o seu traballo sen dureza na única entrada ao cabalo e marchouse con aplausos. Media faena coa franela aguantoulle o colorado, bragado, meano. Primeira quenda de doblones e as dous seguintes de derechazos a media altura. Cambiou de man para ofrecerse con naturais, pero na segunda serie xa non logrou ligazón. Na seguinte, non había por onde sacar. Picou en óso e despois no degolo. Aplausos.
Sexto da tarde: Tomás Rufo e Navajerito
Navajerito, un vistoso negro salpicado (burraco), tivo o mellor resultado da tarde. Sabido é que o toledano está apadriñado pola casa Lozano. Dito que de ben nados é ser agradecidos, o brinde foi para Manolo, quen xunto cos seus sobriños e o seu irmán Eduardo, seguiu a feira desde o canellón. Obrigouno por baixo co tento certeiro. Recoñecidos pases coa zurda. Ovacionadísimo coa dereita, en redondo como un eixo. Volveu ao natural forzando ao touro ata case rozar o albero. Sabedor dunha faena rematada, Rufo estirou con doblones e cravouse de xeonllos. Embebido no quefacer plantóuselle tirando os trastes. Estocada enteira que non fixo caer ao touro antes do primeiro aviso, polo que inseriu dúas veces a cruceta. Orella e leve petición de segunda.
Apenas chegamos que xa nos estamos indo. Juan (Ortega) se non volves iremos buscarte. Daniel (Luque) segue facéndonos gozar do teu bo momento. Mestre Morante, parabén pola volta e a valentía de poñerlle nome a ese outro morlaco ao que te enfrontas fóra dos ruedos. Ata a próxima feira.
Relacionadas:
-
RADIO.- Faladoiro co balance da Feira da Peregrina: Tomás Rufo triunfador dos dous festexos, que puideron ser tres
Por Marisa Ciordia |
-
Talavante sae aos ombreiros nunha tarde de touros xustos de forza, entre o toureo efectista e a arte de tourear a-mo-di-ño
Por Mosrey Fotografía & Marisa Ciordia |
-
O debut de Juan Ortega en Pontevedra e a volta de Morante, acicates para o cheo da praza na Feira da Peregrina
Por Marisa Ciordia |
-
RADIO.- Daniel Luque foi o toureiro máis completo da Feira da Peregrina para os tertulianos taurinos das 'Conversas na Ferrería'
Por Marisa Ciordia |