Desartellada unha organización de Vilanova de Arousa que distribuía cocaína por España e Portugal
Por Oskar Viéitez
O Servizo de Vixilancia Aduaneira da Axencia Tributaria en Galicia desactivou unha organización asentada en Vilanova de Arousa dedicada á distribución de cocaína a diversos puntos de España e Portugal mediante vehículos con dobres fondos.
Segundo informaron fontes oficiais do Ministerio de Facenda, no marco da operación, denominada ‘Patinete’, foron detidos, e atópanse en prisión provisional, o principal investigado, que permanecera máis dun mes en paradoiro descoñecido, así como o condutor dun vehículo que portaba 50 quilos de cocaína.
As investigacións arrincan fai máis dun ano cando o Servizo de Vixilancia Aduaneira en Vigo detecta que o principal investigado, xa coñecido pola súa vinculación co tráfico de drogas por vía marítima, realiza continuos desprazamentos a diversos puntos da península ibérica, o que fai sospeitar aos investigadores que puidese estar novamente vinculado á distribución de substancias estupefacientes que chegan ás nosas costas por vía marítima.
Durante este tempo, os investigadores de Vixilancia Aduaneira puideron determinar que a operativa de repartición da cocaína desenvolvíase utilizando dous vehículos, un que actuaba como vehículo ‘lanzadeira’ e outro como vehículo de carga que terían realizado preto dunha vintena de viaxes destas características a diversos puntos de España, como Asturias, Andalucía e Galicia, así como a Portugal.
Despois dun extenso labor de campo, os investigadores do SVA despregaron, a comezos de xuño pasado, un operativo que permitiu interceptar na autoestrada AP-9, na provincia de Pontevedra, a un vehículo da organización que portaba máis de 50 quilos de cocaína oculta en dous dobres fondos.
O vehículo contaba cun sofisticado sistema de ocultación baixo os dous asentos dianteiros, que se levantaban integramente con parte da carrocería do vehículo. Para descubrir as caletas foi necesaria a utilización do escáner de contedores da Aduana de Vigo.
Nese momento produciuse a detención do condutor do vehículo que transportaba a substancia estupefaciente, mentres que o principal investigado deuse á fuga nunha motocicleta no momento en que ía ser detido polos investigadores e permaneceu en paradoiro descoñecido durante máis dun mes ata que se presentou no xulgado. Ambos se atopan xa en prisión provisional polos presuntos delitos de tráfico de drogas e organización criminal.
Aos anteriores engádese un terceiro, investigado non detido, na zona de Lebrija, ao que se lle atribúe un delito de contrabando de xéneros prohibidos.
Xunto ao operativo na AP-9 levaron a cabo cinco entradas e rexistros en domicilios e naves, tres na zona de Vilanova de Arousa e dúas nas localidades de Lebrija e El Cuervo (Sevilla).
Unha das naves de Vilanova contaba con fortes ancoraxes de seguridade, polo que, para acceder á mesma, durante a madrugada do martes 4 de xuño, foi necesaria a colaboración do Corpo de Bombeiros de Vilagarcía de Arousa.
Ademais de substánciaa estupefaciente, entre os efectos intervidos e poñer ao dispor do xulgado atópanse dous remolques, unha trintena de garrafas de combustible, e mesmo un tractor de elevadas dimensións dos que habitualmente se utilizan para trasladar embarcacións, así como equipos electrónicos, diñeiro en efectivo e diversa documentación.
A detección do tractor, os remolques e as garrafas de combustible levan aos investigadores para entender que polo menos parte da organización dedicaríase tamén ao rescate de estupefacientes introducidos por vía marítima tanto en Galicia como en Andalucía.
As investigacións, realizadas pola Unidade Operativa de Vixilancia Aduaneira de Vigo, coa colaboración da Unidade Operativa de Sevilla para os rexistros, continúan abertas e centradas principalmente nunha análise da documentación intervida, polo que non se descartan novas detencións.