Felipe VI e a raíña Letizia acompañarán á princesa Leonor na súa primeira visita á Escola Naval de Marín
![Alejandro](/web/cache/scene/uploads/xornalistas/foto/dee/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/5624216432-20150128-patxot-alex-espino-002.jpg)
Por Alejandro Espiño
O rei Felipe VI, que estará acompañado da Raíña Dona Letizia e da princesa Leonor, presidirá o vindeiro martes 16 de xullo o acto de xuramento ou promesa ante a bandeira e a entrega de Reais Despachos na Escola Naval Militar de Marín.
Será a primeira visita que a princesa de Asturias fará a este centro da Armada, onde Leonor de Borbón continuará a partir do mes de agosto a súa formación militar.
A estancia na Escola Naval de Marín da princesa, que se prolongará ata xaneiro do próximo ano, completarase coa súa participación no cruceiro de instrución a bordo do buque escola Juan Sebastián de Elcano.
O seu pai e o seu avó realizaron a súa formación na Armada neste mesmo centro militar pontevedrés e, nos anos 1987 e 1958 respectivamente, tamén completaron o cruceiro de instrución neste buque escola.
A entrega de Reais Despachos coincide anualmente coa festividade do Día do Carme, patroa dos mariñeiros e da Armada Española, para condecorar aos novos oficiais da Armada.