Foxen de Tráfico por unha infracción, chocan contra un muro e atópanlles dúas bolsas con marihuana
Por Redacción
A Garda Civil detivo a principios desta semana dous veciños de Vilagarcía de 21 e 23 anos por dous delitos diferentes, un de tráfico e outro contra a saúde pública. Ao cometer o primeiro, cazáronos polo segundo.
Todo ocorreu na tarde do luns 17 en Vilagarcía, na estrada VG-4,3 que comunica esta localidade con Cambados. Unha patrulla do Destacamento de Tráfico de Pontevedra deu sinais de alto a un turismo porque detectou unha infracción administrativa, pero fixo caso omiso ás indicacións e fuxiu.
O turismo, marca Audi A-3, estaba ocupado por dous mozos e emprendeu a fuga a gran velocidade por varios viais da zona de Cornazo, poñendo en risco aos ocupantes de varios vehículos que circulando de forma correcta. Esoutros coches tiveron que realizar manobras evasivas para evitar unha colisión frontal.
Durante a fuxida, o turismo chocou co peche dunha leira e os seus dous ocupantes continuaron a fuga a pé. Nese momento, os axentes obseraron como lanzaban un paquete ao Río dá Lomba.
No paquete había dúas bolsas prensadas cheas dunha substancia que todo apunta que é marihuana e os axentes lograron recuperalas.
Finalmente, os gardas lograron deter os dous mozos e atribúenlles eses dous delitos contra a seguridade viaria e contra a saúde pública por tenencia ilícita de drogas.
Durante a detención tamén interviñeron a un deles un arma de fogo simulada.
O equipo GIAT do Subsector de Tráfico de Pontevedra instrúe as correspondentes dilixencias, xa trasladadas ao Xulgado de Garda de Vilagarcía de Arousa.