A conexión indio-pontevedresa detrás do primeiro centro galego en Asia
Por Natalia Puga
Raúl Villamarín Rodríguez naceu en Pontevedra e en 2012 unha bolsa de intercambio do Rotary Internacional levouno á Universidade de Mumbai, en India. Chegou para un ano académico, pero finalmente asentouse no país e actualmente é o vicepresidente da Universidade de Woxsen.
Na mesma institución é profesor Anik Nandi, un sociolingüista de orixe bengalí que leva 17 anos de carreira estudando a lingua galega e actualmente dirixe o Centro de Idiomas e Comunicación Multicultural.
Os seus camiños cruzáronse nun despacho falando galego e esa conexión deu lugar á posta en marcha do primeiro Centro de Estudos Galegos en Asia. Foi a propia Universidade de Woxsen a que anunciou a súa creación e reivindicou que, na práctica, converteuse no primeiro centro galego no continente.
Froito da colaboración entre a institución india e a Secretaría Xeral da Lingua da Xunta de Galicia, que achegará un financiamento de 4.000 euros, esta nova entidade servirá, segundo a universidade, para "fomentar unha comprensión e unha apreciación máis profundas da cultura, a lingua e a historia de Galicia no continente asiático".
Suporá, en palabras de Raúl Villamarín, "unha revolución para Galicia" e un proxecto necesario "para conectar a parte cultural galega con India e ramificar a outras vertentes". En conversación con PontevedraViva, este pontevedrés destaca que, con esta nova institución, que ten a súa sede na Universidade de Woxsen, "a comunidade galega terá un link directo con India e todo o que encobre".
A orixe deste logro está no encontro entre Raúl e Anik e foise madurando ao longo do tempo até frutificar na actualidade, nun momento no que hai nesta universidade catro galegos, dous pontevedreses e outros dous naturais de Lugo e Santiago, un número inusualmente alto nun país no que "non cruzan a ducia". Ao xuntarse, "empezamos a ver que se podía facer por Galicia" e, con Anik, decidiron impulsar esta entidade.
Non existe un perfil de emigrante galego en India, segundo explica Raúl. "A maior parte" chegan ao país traballando con empresas españolas e, con este centro, terán un punto de encontro, unha especie de embaixada de Galicia ao estilo das existentes desde hai décadas noutros países da diáspora que lles permitirá manter os vínculos coa súa terra e a súa cultura nun país no que "a dinámica de traballo e vida é moito máis veloz a España e Galicia".
Este novo centro diríxeo Anik "para todos os efectos", terá a súa sede na universidade, no Centro de Idiomas e Comunicación Multicultural, e conta con catro colaboradores na actualidade, entre galegos e indios, que se encargan das funcións administrativa. Raúl ocupa, nesta universidade, un posto equivalente ao vicerreitor en España e é responsable da parte académica e as relacións exteriores. No centro terá ese mesmo papel.
Nos seus plans entran moitos retos e mesmo confían, segundo explica Raúl, en que "se se fai ben e a Xunta coopera, podemos até establecer o CELGA, como se fixo co DELE para o castelán como idioma no estranxeiro".
Ademais, permitirá "dar a coñecer todo o que Galicia ofrece, xa que a xente non o coñece", tanto entre a comunidade educativa como no resto do país. Con 4.200 estudantes, esta universidade privada está situada nun campus de máis de 80 hectáreas en Hyderabad, a cuarta cidade máis poboada da India e unha das máis puxantes na economía do país.
Anik Nandi, Doutor en Linguas e Estudos Interculturais, é gran coñecedor e estudioso da sociolingüística da lingua galega, realizou un posgrao na Universidade de Santiago na especialidade de Lingüística e colabora coa Real Academia Galega e o Consello da Cultura Galega. En perfecto galego, explicou a PontevedraViva que este centro nace del polo seu vínculo con esta terra e porque "quería levar sempre Galicia non corazón".
Aínda non hai data para iniciar as actividades do centro, que incluirán un curso de iniciación ao galego destinado aos 160 alumnos de español e outros estudantes con interese en realizar algún intercambio con Galicia ou aprender unha nova lingua. "Aínda está por definir", explica.
E engade que a achega da Xunta de Galicia para promover a lingua e a cultura galega programan usala para axudar a organizar dous congresos.
Un será en agosto con participación do profesor da Universidade de Salamanca Pedro Álvarez, lingüista que traballou sobre rumbos lingüísticos e actitudes implícitas entre estudantes universitarios de Galicia. O outro, un simposio inaugural do Centro de Estudos Gallgos que prevén para setembro e ao que queren citar a un grupo de hispanistas para "conectar as dúas culturas a través da literatura".
A súa intención é fomentar a colaboración co Instituto Cervantes, pois "non podemos estar sós", e tamén coa Embaixada de España en Deli e o Consulado de España en Mumbai, ademais de abrir vínculos cunha cátedra en sociolingüística galega e promover que cheguen até India actividades como unha exposición sobre Alfonso X que impulsa o Consello da Cultura Galega.
Un proxecto sobre xornalismo en linguas minoritarias que compare a situación do galego nos medios como a das linguas minorizadas en India tamén está entre os seus plans de futuro.