O PP pedirá que o Concello invista un millón de euros para que estudantes de 13 anos viaxen a Reino Unido
Por Anxo Lourido
Rafa Domínguez, portavoz municipal do PP, e Aroa Otero, responsable nesta agrupación na área de Educación e Cultura, presentaban este martes a moción que o grupo municipal popular levará ao pleno este mes co obxectivo de que o goberno local ofreza a adolescentes de terceiro da ESO viaxes a Reino Unido e Irlanda durante o verán.
A iniciativa xa fora presentada en 2022 polo grupo popular e foi rexeitada polo BNG e polo PSOE durante a sesión plenaria.
Agora, o Partido Popular retoma esta proposta porque "cremos que é importante que teñan a oportunidade", indicou Rafa Domínguez, ao referirse a escolares empadroados en Pontevedra, de 13 anos, con todas as asignaturas do curso aprobadas. A través desta fórmula, segundo entende Domínguez, mellorarán o seu nivel de inglés, ademais de enriquecer a súa perspectiva persoal e cultural adquirindo independencia e autoconfianza.
O PP propón que con fondos municipais se pague a viaxe e a estancia durante tres semanas; con monitores bilingües, un por cada dez nenos; con matrícula de curso intensivo de inglés; actividades culturais, deportivas e seguro médico; ademais da entrega dun certificado.
Sería gratuíto para pais monoparentais; ou que estean no paro ou con rendas inferiores aos 15.000 euros. Os que tivesen unha renda superior pagarían un 25%, que sería arredor de 260 euros aproximadamente.
O cálculo é que 900 escolares se beneficiarían e o Concello de Pontevedra asumiría o montante dun millón de euros ao calcular que o importe alcanzaría unha cifra de 1.150 euros por estudante.
"Chegou o momento de pensar nas persoas, en establecer novas dinámicas e ofrecer un ocio distinto ao botellón. Isto non é só ocio senón unha experiencia, ademais educativa", apuntou Rafa Domínguez sinalando que esta iniciativa está a desenvolverse con éxito noutras cidades e que é unha demanda da cidadanía.
Acusou o goberno local de estar "a facilitar un lugar para que os mozos vaian beber alcohol. Non digo que se promocione, digo que se facilita", expuxo Domínguez. "Non se poden facer polítcas do século XX", insistiu.
Engadía tamén que o PSOE levou esta iniciativa no seu programa electoral e que, ademais, en cidades como Vigo onde gobernan tamén se desenvolve esta actividade durante os veráns. "Xa se está facendo e funciona", afirmou Rafa Domínguez apuntando a que esta fórmula fomentaría a "cultura do esforzo" ao estar destinado a estudantes con todas as asignaturas aprobadas.
Relacionadas:
-
Acordo unánime para impulsar a Illa das Esculturas e para construír un edificio municipal de emerxencias
Por Alejandro Espiño |
-
A modificación de crédito será o asunto máis destacado do pleno do próximo luns
Por Oskar Viéitez |
-
O pleno do "non é non, porque vén do PP"
Por Alejandro Espiño & Mónica Patxot |
-
O PP pedirá que o Concello financie viaxes e estancias de estudantes de 3º da ESO en Reino Unido para que aprendan inglés
Por Anxo Lourido |