Ingresa en prisión o mozo detido por cortar o pescozo a un compañeiro de piso
Por Natalia Puga
O Xulgado de Instrución número 2 de Pontevedra acordou enviar a prisión ao mozo de 20 anos detido na madrugada do xoves por tentar matar o seu compañeiro de piso, ao que cortou o pescozo cun cúter.
Tras pasar un día nos calabozos da Comisaría da Policía Nacional, o mozo pasou a disposición xudicial ao longo da mañá deste venres e o xuíz de garda acordou o seu ingreso en prisión provisional, comunicada e sen fianza.
Segundo a información facilitada polo Tribunal Superior de Xustiza de Galicia (TSXG), está investigado por tentativa de homicidio ou lesións agravadas, un delito que aínda terá que determinar o xulgado ao longo da instrución do caso.
A vítima, un home de 47 anos, foi operada de urxencia no Hospital de Montecelo, onde foi atendida por un corte no pescozo que precisou vinte puntos de sutura, pero xa ao longo da xornada do xoves recibiu o alta. O corte estivo a piques de seccionarlle a xugular.
Os feitos rexistráronse nunha vivenda semiabandonada situada no barrio pontevedrés da Seca que compartían o detido e a vítima.
Segundo as primeiras investigacións, o ataque produciuse no transcurso dunha discusión iniciada supostamente polo uso dun teléfono móbil.
Os investigadores localizaron o cúter empregado na agresión.
Relacionadas:
-
Incidente entre os pais dun neno e unha condutora tras un atropelo en Echegaray
Por Natalia Puga |
-
O home ao que cortaron o pescozo na Seca: "Veume detrás, tívenme que defender"
Por Redacción |
-
Un mozo de 20 anos, detido en Pontevedra por intentar matar o seu compañeiro de piso cortándolle o pescozo
Por Alejandro Espiño |