Impulsan medidas para apoiar iniciativas emprendedoras en Poio relacionadas coas variantes xacobeas
Por Oskar Viéitez
O Concello de Poio puxo en valor este mércores o potencial das variantes xacobeas para crear riqueza e emprego a través do emprendemento e comprometeuse a impulsar as "iniciativas innovadoras" mediante un paquete de medidas en apoio das persoas emprendedoras.
Estas medidas incluirán un espazo dedicado en redes e material impreso, campañas de formación, axuda e axilidade nos trámites e puntos de atención ao emprendedor e ao peregrino que se porán en marcha nas próximas semanas.
O anuncio fíxose no marco da I Xornada de Emprendemento no Camiño, un foro que se celebrou durante este mércores e que inaugurou o alcalde Ángel Moldes, acompañado do secretario xeral de emprego da Xunta, Pablo Fernández, a deputada provincial de Turismo, Nava Castro, o xerente da Mancomunidade do Salnés, Ramón Guinarte, e a directora da área de negocio de CaixaBank para Pontevedra Norte, Lorena Giadanes.
Máis de 50 emprendedores e persoas interesadas escoitaron no Casal de Ferreirós estas oportunidades de negocio e emprego nas variantes xacobeas que atravesan o concello.
Durante a inauguración, Moldes fixo alusión aos datos aportados polo xerente da Mancomunidade do Salnés, que sinalou que a variante espiritual do Padre Sarmiento é un dos produtos de maior éxito.
"E nós, desde Poio, estamos percibindo que cada día son máis as persoas e os negocios que se moven ao redor desa variante. O Camiño e as variantes son un grande desestacionalizador do turismo, e supón unha oportunidade que non debemos desaproveitar para crear riqueza, emprego e futuro no noso concello", dixo.
A xornada completouse cunha pausa café dentro das propias instalacións do Casal de Ferreirós, e unha mesa redonda na que participaron Carmen Fuentes, xerente do Albergue Nuestra Señora del Camino, Raquel Santamaría, directora do Hotel Covelo; Albino Vázquez, de ASNAUGA; e Sabela Gippini, CEO de Galiwonders, que ofreceron as claves do emprendemento en primeira persoa, nunha mesa redonda moderada pola tamén emprendedora Elena Vitoria, de Cartablanca e Salmoira, e que deu lugar a un coloquio.
Pola súa banda, a concelleira de Turismo, Rocío Cochón, clausurou a xornada resaltando que "tanto para iniciar unha actividade empresarial como para dar o primeiro paso do Camiño de Santiago utilízase a mesma palabra: emprender", e puxo en valor "que Poio está cheo de oportunidades e tamén de veciños e veciñas con grandes ideas e a a capacidade de poñelas en práctica".
Durante o foro, anunciaron que nos próximos meses o Concello de Poio implantará un paquete de medidas para facer o camiño do emprendemento máis doado e que incluirán: un espazo específico para as iniciativas innovadoras no Camiño nas redes e no material promocional físico; a ampliación da estratexia "No Bo Camiño" e a divulgación dos datos.
Ademais, tamén anunciou a creación dun itinerario áxil e directo para os trámites e permisos municipais e accións formativas para mellorar a internacionalización e a dixitalización, un impulso para a renovación e mellora da sinalética e da mobilidade dos peregrinos e, por último, a creación dun punto de información ao peregrino para os usuarios das dúas variantes nunha ubicación estratéxica e un punto de información ao emprendedor no Camiño, no que todos os que desexen emprender poderán coñecer información sobre axudas, trámites e todas as ferramentas que se lles ofrecen.