Recoñecemento a Carlos Carballa "Carramón" pola súa achega á historia da fotografía de Sanxenxo
Por Redacción
O coñecido fotógrafo portonovés Carlos Carballa, máis coñecido como "Carramón", recibiu a insignia da cámara de ouro pola súa achega á historia da fotografía do municipio.
O acto enmárcase dentro da exposición ao aire libre de imaxes antigas do municipio organizada pola Asociación Ollares de Portonovo e o Concello de Sanxenxo que ata este jueves estarán no parque do Espiñeiro de Portonovo e o próximo 11 e 12 de xuño, na Praza de Pascual Veiga.
En total son máis de 2.500 imaxes do municipio que van desde os anos 50 ata a actualidade. Ademais, hai unha aérea do ano pasado de Portonovo de cinco metros de longo e tres de ancho a modo de photocall.
A concelleira de Cultura, Elena Torres, foi a encargada de facerlle entrega da insignia a Carlos Carballa que contou os seus inicios no mundo da fotografía.
"Pode sonar raro, pero empecei a interesarme pola fotografía cando saía da Escola Naval de Marín no maleteiro dun coche durante a miña etapa na mili", lembra. Ese pequeno buraco do maleteiro e o reflexo de todos os edificios na súa gorra a modo de "caixa negra" provocou no "unha fascinación". Foi nese momento no que empezou a realizar de forma totalmente autodidacta fotos cunha cámara compacta, Werlisa, aos seus compañeiros. "Vendíalles cada foto a 25 pesetas", sinala.
Cando acabou o servizo militar, funda en Portonovo o primeiro estudo de fotografía, Studio 21, en 1981, e pode presumir de contar aínda con máis de 15.000 negativos de fotos históricas de Sanxenxo: "Teño fotos da primeira nevada en Portonovo, das cisternas da auga cando houbo sequía, de estradas en terra…", asegura. Un amplio arquivo de fotografías que se expoñerán en próximas edicións.
O premio non o colleu por sorpresa, porque forma parte do colectivo Ollares de Portonovo, e mesmo recoñece que tentou disuadirlles, pero "non houbo forma".
Antes que a Carlos Carballa, fíxoselle entrega da cámara de ouro a Gerardo Torres de Foto Torres, e a Olimpio Piñeiro de Foto Olimpio, neste caso a título póstumo.