Habilitan un itinerario para manter aberto o aparcadoiro de Nauta
Por Oskar Viéitez
Despois de anunciar que desde este luns, 3 de xuño, o aparcadoiro de Nauta permanecería pechado por causa das obras para converter o Paseo de Silgar en plataforma única, o Concello de Sanxenxo acaba de rectificar esa decisión.
Segundo informa este luns o Concello de Sanxenxo, o aparcamento de Nauta permanecerá aberto durante as obras tras habilitar un novo itinerario de acceso.
Os coches bordearán o aparcadoiro tras acceder polas rúas: Cesteiros, Viña da Fonte, Consistorio e Augusto González Besada atravesando o vial de acceso ao porto e finalizando no estacionameinto exterior ou no interior.
Para saír os condutores terán que bordear novamente o aparcadoiro ata a Praza dos Barcos, seguindo polas rúas: San Isidro, Carlos Casas e Oriente.
Un equipo de 50 persoas traballará de luns a sábado en dúas quendas para poder rematar os traballos en tempo.
A obra terá finalmente un custo de 626.919 euros e o obxectivo é dar prioridade aos desprazamentos a pé, así como mellorar a accesibilidade e seguridade viaria. O ámbito de actuación será desde o cruzamento da Rúa Ourense ata a intersección coa Rúa Cesteiros, incluído un tramo da Rúa do Porto. En todo este tramo habilitarase unha plataforma única en lastro que
terá unha superficie de 4.783 metros cadrados.