O mercado estival de Portonovo estará inspirado na súa tradición mariñeira
Por Redacción
Oitenta casetas fabricadas especificamente para esta cita darán forma ao mercado de verán de Portonovo, cuxo deseño estará inspirado na tradición mariñeira do pobo.
Así o evoca a proposta gañadora do concurso convocado polo goberno municipal, que asina a empresa Madeira Arquitectura e Deseño.
A feira contará con pérgolas de madeira e teas a modo de vela de barco, ao longo de todo o poboado mariñeiro.
Tamén se colocarán cinco casas imitación a pedra, a tamaño real cunhas fachadas de nove metros de longo por catro metros de fondo e catro metros de alto, ademais de arcos de soportais e balcóns, tamén en imitación de pedra.
O deseño está totalmente adaptado á estética mariñeira, que se pode apreciar visualmente coa cor branca e azul das casas de madeira e do paseo con postes en cor blancoven e tanas tipo ollos de boi, embelecidas con decoracións de áncoras ou flotadores náuticos.
No paseo haberá redes mariñeiras engarzadas en todos os postes que o compoñen no seu percorrido, complementados con elementos decorativos, como son unha barca ou unha estatua de mariñeiros.
O deseño completarase cunha iluminación decorativa con 3.000 metros lineais de cable e 6000 lámpadas repartidas por toda a superficie das pérgolas de sombreo.
Esta feira, coa que o Concello prevé ingresar 110.000 euros, comezará a finais de xuño e prolongarase ata o 1 de setembro.
A proposta de venda será variada, desde complementos ata artigos téxtiles. Quedan excluídos do ámbito os postos de carácter alimentario, sen que poidan ocuparse casetas destinadas á venda ou comercialización de calquera produto alimenticio ou bebidas.