Falece un segundo paciente do CHOP ingresado por gripe
Por Redacción
O Complexo Hospitalario Universitario de Pontevedra rexistrou a segunda vítima mortal por gripe no que vai de ano. Segundo os datos facilitados pola Consellería de Sanidade, trátase dun paciente que estaba ingresado desde hai días no hospital pontevedrés. ÿnese a morte doutra persoa en Vigo. Con eles son xa dez os falecidos en Galicia en relación co virus da gripe.
O subdirector xeral de Información sobre Saúde e Epidemioloxía da Consellería de Sanidade, Xurxo Hervada, comentara que os oito falecidos anteriores en Galicia no marco da vaga de gripe eran todos casos con factores de risco que tiñan patoloxías de base.
En total, a cifra de pacientes ingresados en hospitais de Galicia debido ao virus da gripe sitúase este luns en 146, dous máis que o venres, segundo os datos de Sanidade, dos cales 34 están na Unidade de Coidados Intensivos (UCI) dos centros correspondentes. Ao respecto, Sanidade indicou que "parece que empeza o descenso" do pico da vaga da gripe en Galicia, á espera de como evolucione esta semana.