Mercé Alegría acaba de presentar no Casino de Pontevedra a súa última publicación, 'Trece ocas'. O antiquísimo xogo de mesa é o que propiciou este título. Leva nove anos investigando sobre as súas orixes, simbolismo e vínculos.
Un deles é o Camiño de Santiago: "dise que era un xogo iniciático dos templarios co que instruían aos cabaleiros que ían facer o Camiño", explica a autora no podcast 'Cara a cara'.
Trece son as ocas que se van sucedendo durante o xogo, un número que simboliza a transformación e rexeneración - moi lonxe desa mala fama que se lle adoita atribuír á cifra -; ata chegar á decimocuarta que é a que aparece debuxada unha vez que se conclúe o percorrido.
Un itinerario que é unha viaxe de autocoñecemento e ao que a autora leva ao protagonista do libro, Andrés, un mensaxeiro en bicicleta a quen unha entrega faille iniciar un camiño alén dunha ponte, nun lugar descoñecido. Nese tránsito viaxará polas súa crise persoal. 'Trece ocas' tamén vai acompañada dunha banda sonora que igualmente se pode visitar.
Non deixamos pasar outra faceta de Mercé e é que xunto ao que foi o seu marido, Xosé Carlos Pereira, rexentaron a mítica taberna Heicho de Dar Queridiña, na Insua, Ponte Caldelas, durante os anos 90. Un lugar pioneiro naqueles momentos e que foi unha referencia para quen quería tocar e escoitar música tradicional galega.
O podcast está dispoñible para escoita e descarga na web dePontevedraViva Radio e tamén se pode escoitar desde a ligazón que se adxunta.