O BNG propón un proxecto para recuperar o cultivo tradicional da cebola en Vilaboa
Por Redacción
O BNG de Vilaboa propón un proxecto para a recuperación do cultivo tradicional da cebola no municipio co obxectivo de poñer en valor o traballo agrícola realizado polas mulleres e o empoderamento destas para que sexan as protagonistas da historia.
Entre as súas propostas figura a creación dunha cooperativa de productores de cebola na que se unifiquen criterios de producción, etiquetado e comercialización ou a organización dunha festa gastronómica na que se realce o seu valor culinario e medicinal.
O proxecto completaríase coa posta en marcha dunha feira periódica para a comercialización da cebola e outros productos do campo e a recuperación do Camiño Real, que era o sendeiro que as mulleres facían para levar as legumbes a vender de Vilaboa a Marín.
A candidatura nacionalista que encabeza Ornela Fernández prevé un proxecto a desenvolver en varias fases. A primeira é o coñecemento e recoñecemento das persoas que continúan con este cultivo no concello. A segunda sería un levantamento de dados de superficie cultivada hai 40 anos e a superficie cultivada hoxe en día. A terceira fase será a posta en marcha dunha cooperativa e dun banco de terras onde poder levar a cabo os cultivos. A fase final será a dinamización, comercialización e posta en valor do producto resultante.