12 probas deportivas de rango nacional e internacional terán a súa sede en Pontevedra en 2014
Por Diego Espiño
"Posiblemente é o calendario máis ambicioso dende que estou na concellería". Así definde o reponsable municipal de Deportes de Pontevedra, Agustín Fernández, o programa de eventos deportivos para 2014.
A falta de que poida pecharse algunha cita a maiores, serán 12 as probas de rango nacional e internacional as que terán como sede a cidade de Lérez entre os meses de febreiro e setembro.
O eixe central será o Campionato do Mundo de Dúatlon, os días 31 de maio e 1 de xuño, "posiblemente a proba deportiva máis importante do ano en Galicia", pero destacan outros eventos, case todos xa confirmados nos últimos meses.
Así, Pontevedra acollerá en febreiro o Campionato de España Júnior de Taekwondo (do 14 ao 16) ou o Nacional Infantil de Natación (do 27 de febreiro ao 2 de marzo).
No terceiro mes do ano comezarán as citas co piragüismo desveladas hai poucos días, empezando polo Open Internacional Kayak-Canoa Cidade de Pontevedra (8 e 9 de marzo) e seguindo pola Copa de España de 1.000 metros (26 e 27 de abril), Copa de España de 200 e 500 metros (24 e 25 de maio), Campionato de España de Promesas (do 25 ao 27 de xullo) e a Copa de España de Maratón (en principio 2 e 3 de agosto).
Tamén transcendera a celebración do Campionato de España Infantil de Baloncesto Feminino (do 15 ao 21 de xuño) e o Campionato Ibérico de Raid (13 e 14 de setembro).
Entre as novidades, dúas citas coa ximnasia, a Copa Galicia (do 7 ao 9 de marzo) e o Campionato de España de Trampolín (do 25 ao 29 de xuño).
En total, segundo Fernández, serán preto de 7.000 os deportistas que visiten a cidade para participar nalgún dos eventos, nos que está previsto investir preto de 450.000 euros á vez que "calculamos un retorno económico aproximado duns 4 millóns de euros sendo cautelosos".