Debut na máxima categoría con vitoria a domicilio (1-2) do Poio Pescamar en Móstoles
Por Redacción
Chegar e bicar o santo. O Poio Pescamar non acusou en absoluto nin os nervios propios do debut na Primeira División, nin a inexperiencia nas súas xogadoras, que saíron á pista mostoleña dispostas a dar a primeira satisfacción aos seus seguidores e a bo seguro que o lograron.
As rapazas que dirixe Marcio Santos levaron a iniciativa e o peso do partido dende o asubío inicial, creando numerosas ocasións que moi ben puidéronlle servir para resolver o resultado xa na primeira parte. Pode que o temperán gol de Claudia, aos tres minutos de xogo, o primeiro para a historia das 'rojillas' na máxima categoría, tería servido para que o equipo se soltase definitivamente, pero o certo é que a partir de aí o Poio foi superior e apenas sufriu.
Nin sequera o feito de encaixar o gol do empate pouco antes do descanso fixo dubidar ao cadro de Poio, tal é xa a fortaleza mental dun equipo que promete grandes cousas. Dese modo a segunda metade seguiu con dominio visitante, ata que Ceci lograba poñer de novo por diante as de Marcio Santos.
Xogaba mellor o Poio e tiña oportunidades para sentenciar o marcador ao seu favor, pero non obstante sería o Móstoles quen dispuxo dunha ocasión de ouro para empatar cando a falta de pouco máis dun minuto para a finalización os árbitros decretaron penalti a favor das madrileñas. Entón apareceu providencial Silvia para deter o lanzamento de Patri Chamorro, facendo xustiza, xa que o Poio Pescamar merecera sobradamente a vitoria, asinando un brillante debut na máxima categoría do fútbol sala feminino.
FSF MÿSTOLES (1): Pauli Yáñez; Patri Chamorro, María Otero, Inma Martín, Eva Manguán -cinco inicial-, Beatriz Montaña, Celia Jiménez, Cristina Camacho, Raquel Díaz e María García.
POIO PESCAMAR (2): Silvia; Charo, Kiko, Claudia, Ceci -cinco inicial-, Carmen, Mar, Tania, Pomba, Peke, Yoli e Elena.
Árbitros: César Iglesias e Javier Soler (Madrid). Amoestaron a Charo.
Goles: (0-1) Minuto 3: Claudia. (1-1) Minuto 19: Raquel Díaz. (1-2) Minuto 27: Ceci.
Incidencias: Pavillón de Villafontana (Móstoles). Uns 120 espectadores.