Chega a XV edición do Torneo Internacional de Tenis de Mesa organizado polo Enmacosa Monte Porreiro
Por Diego Espiño
Un total de 306 xogadores inscribíronse na XV edición do Torneo Internacional de Tenis de Mesa que organiza o Enmacosa Monte Porreiro.
O club pontevedrés presentou unha nova edición do evento, que se desenvolverá os días 7 e 8 de setembro no Pavillón Municipal dos Deportes, cambiando a súa situación habitual de Príncipe Felipe polas obras que se están a realizar nas instalacións.
O presidente o Monte Porreiro, Lucho Álvarez, animou os afeccionados a este deporte a que se acheguen a ver unha competición que contará con entrada de balde e, segundo as súas palabras, cun gran nivel de participación: "contaremos con los mejores jugadores gallegos y con los nacionales y extranjeros que juegan en nuestro clubes".
O sábado, de 10:00 a 14:00 horas e de 16:00 a 20:00 horas xogarase o torneo sénior, deixando para a xornada dominical, en mesmo horario, a competición nas categorías de base.