Cristóbal Domínguez non renova co Pontevedra e vaise ao Villalonga
Por Ramiro Espiño
Segue a fuga de canteranos no Pontevedra. Despois da non renovación de Javi Pazos, Pacheco e as máis que posibles marchas de Buba e Pibe, agora lle chega a quenda a Cristóbal Domínguez. O defensa central, que a pasada tempada actuou no filial granate, pero con presenza habitual nos adestramentos do primeiro equipo, co que participou nun bo número de partidos, abandona a disciplina do Pontevedra para asinar polo Villalonga.
O propio xogador confirmaba a noticia a PontevedraViva: "Aínda non hai nada asinado, pero chegamos a un acordo. Hai un bo proxecto para ascender. Xa me querían a tempada pasada, pero non puido ser e este ano vou con toda a ilusión para axudar ao equipo a regresar a Terceira División".
Con respecto á súa saída do Pontevedra, Cristóbal Domínguez comentou: "Eu cheguei ao Pontevedra en idade xuvenil, polo que xa son máis de tres anos alí. Milo falou comigo, pero o único que me ofrecía era seguir no filial, coas mesmas condicións económicas pero con peores condicións deportivas, xa que me dicían que non tería opción de xogar co primeiro equipo nin sequera, adestrar con eles, como fixen este ano pasado, así que me decidín por aceptar a oferta do Villalonga, que sempre mostrou moito interese con contar comigo, para intentar seguir avanzando na miña traxectoria deportiva,".
En canto ao Villalonga, tras aceptar Julián Ferreiro a oferta para renovar co club celeste, a directiva dos de San Pedro púxose a traballar co obxectivo de poñer en mans do técnico un equipo competitivo co que aspirar a recuperar de inmediato a categoría perdida. Así, e aínda a pesar de perder pezas importantes como Miguel Vázquez (Pontevedra), Roberto Pazos (Boiro) ou Fran Matos (Rápido de Bouzas), o club conseguiu as renovacións de Saúl, Machu, Leo, Ramón e Jorge Fernández, incorporando a xogadores chamados a xogar un papel importante, como Albor (Cerceda), Arias (Choco), Dani Abal (Cambados), Cuqui (Boiro) e Manu (Ribadumia), ademais de subir aos canteranos Rafa, Martín e Víctor Giao.
Coa incorporación de Cristóbal Domínguez, o Villalonga ten ben cuberta a parcela defensiva, e espera a resposta de Tenorio, a quen se lle ofreceu a renovación, para completar un equipo que comezará a pretempada o día 22 con outros tres xogadores máis.