Cristóbal Juncal, Stefan e Moisés Pereiro denuncian o Pontevedra ante AFE por impago
Por Ramiro Espiño
Seguen os problemas no Pontevedra. Despois dunha tempada de constantes atrasos nos pagamentos aos xogadores e empregados do club, aínda pendentes de resolver, o problema agora vese agravado pola denuncia que presentaron tres dos xogadores que non continuarán no equipo ante a Asociación de Futbolistas Españois (AFE). Segundo puido saber PontevedraViva, Cristóbal Juncal, Stefan e Moisés denunciaron o club granate por impago dunha cantidade total próxima aos 19.000 euros.
A denuncia ante o Sindicato de futbolistas ao militar en Terceira División non carrexa descenso administrativo de categoría, pero AFE deu traslado desta á Federación Territorial correspondente, neste caso a Galega, quen, en tanto o club non salde a débeda, adoptará a postura de non tramitar ao Pontevedra licenza ningunha para a próxima tempada.
Cristóbal Juncal é o que reclama unha cantidade maior, xa que se lle deben 11.500 euros, cantidade que podería equivaler a sete mensualidades. A Stefan Oreiro débenselle 6.000 euros, mentres que Moisés Pereiro reclama 1.500 euros.
Fontes da Federación Galega non puideron confirmar se, ademais destes tres xogadores, pode haber outras denuncias correspondentes a xogadores sen ficha profesional, aínda que non as descartan, o que, en caso de producirse, tería o mesmo tratamento comentado de paralizar a tramitación de licenzas ao club.
Esta situación, ademais, podería ter serias repercusións de cara ao futuro e en caso dun hipotético ascenso a Segunda División B, xa que a Federación está a obrigar a presentar avais a aqueles equipos con antecedentes de non pagamentos ou denuncias dos seus xogadores.