A ría de Pontevedra prepárase para unha fin de semana deportiva co tradicional Trofeo Las Anclas de vela
Por Redacción
Volve unha das citas deportivas con maior tradición na comarca, o Trofeo Las Anclas de Vela organizado pola Escola Naval Militar.
A competición chegará á súa 52º edición durante o sábado 30 e o domingo 31 de marzo, conmemorando o V Centenario da 1ª Volta ao Mundo e tamén coa III Regata Internacional de Academias Navais.
O Trofeo Las Anclas é un dos máis antigos para embarcacións da clase Snipe que se disputan na Ría de Pontevedra, e unha das regatas de maior tradición no calendario da Federación Galega de Vela xa que se celebra cada ano desde 1968.
A competición contará coa participación máis de trinta equipos procedentes de toda España e Portugal, dúas dotacións de Alumnos da Escola Naval, e as tripulacións formadas por alumnos procedentes de sete Academias Navais Europeas: Portugal, Francia, Alemaña, Italia, Polonia, Romanía e Bulgaria.
A área de regatas estará nas proximidades da Escola Naval Militar, o que permitirá seguir a competición desde a costa. O sábado 30 a 14:00 horas realizaranse as tres primeiras probas e o domingo 31 ás 11:30 horas as tres últimas, finalizando a 15:30.