Cambados prepárase para a fase de ascenso do Xuven á LEB Prata
Por Diego Espiño
Despois de concluír primeiro de grupo na fase regular da Liga EBA, o Club Xuventude Baloncesto prepárase para xogar como anfitrión polo ascenso á terceira categoría do baloncesto nacional, a LEB Prata, o próximo fin de semana.
Dende o venres e ata o domingo o Xuven pelexará por ese dereito no pavillón do Pombal ante un segundo, terceiro e cuarto clasificado do resto de grupos, concretamente Meridiano Santa Cruz de Tenerife, CB Novaschool Málaga e El Olivar Zaragoza, filial do CAI da Liga ACB.
Co seu público apoiando os amarelos buscan concluír en primeira posición, posto que outorgaría o ascenso, nunha fase final na que se enfrontarán o venres (21:30 horas) ao Novaschool, o sábado (18:00 horas) a El Olivar e o domingo (12:30 horas) a Meridiano Santa Cruz.
O prezo fixado para o torneo é de 25 euros para todo o torneo para os non socios, unha cifra que se rebaixa a 20 euros para os socios do Xuven e a 10 para os menores de 15 anos, garantindo o aboamento un asento na bancada lateral do pavillón. A entrada diaria ascende tamén a 10 euros, podendo adquirirse no mesmo pavillón do Pombal.
En busca de animar aos seus afeccionados e encher as bancadas, o Club Xuventude Cambados publicou un vídeo promocional da fase de ascenso.
O MARÍN PEIXEGALEGO XOGARASE O ASCENSO EN MADRID
Pola súa banda o Marín Peixegalego, segundo na liga regular, acudirá a Madrid co mesmo obxectivo que o Xuven, lograr o ascenso á LEB Prata. O equipo marinense enfrontarase ao anfitrión, o Real Canoe, ao Montajes Rueda de Andújar e ao Sabadell Sant Nicolau.
O Peixe estrearase o venres (18:15 horas) ante o Sabadell, continuando a competición o sábado (19:45 horas) ante o Canoe e pechando a súa participación o domingo (10:30 horas) contra o Montajes Rueda.