O Arxil, preto de conseguir a permanencia en Liga Feminina 2 nos despachos
Por Redacción
A comisión delegada da Federación Española de Baloncesto acordou manter o actual formato de competición na Liga Feminina 2, con dous grupos de 14 equipos cada un, logo dun ano no que o número de clubs diminuíu polas diversas renuncias de varias entidades con problemas económicos.
Con esa composición quedarían ata cinco prazas vacantes na segunda categoría nacional, tendo en conta que o Grupo agora mesmo quedou reducido a 10 equipos, ao sumar o descenso do Arxil en pista, e o Grupo B por 9, logo de dous ascenso e un descenso.
Esas son as prazas ás que aspira o Club Baloncesto Arxil e que logo dos últimos acontecementos vólvense máis accesibles, aínda que a decisión da comisión delegada aínda debe ser aprobada pola Asemblea Xeral da federación.
Ante a perspectiva de lograr finalmente a permanencia nos despachos o club verde deu os primeiros pasos para confeccionar o plantel da próxima tempada e, logo de discutilo co corpo técnico, acordaron que o obxectivo principal será manter á práctica totalidade das xogadoras do curso recentemente finalizado.
Os plans da cúpula arxilista pasan por renovar a Carla, Jara, Cristina, Ana Martín, Andrea Carrera, Sandra, Olga Federova, Fany e Natalia Soage. A esta relación hai que engadir o posible regreso de María Lago, pero non se atopan na lista Marina Ramírez, que se afastará das pistas pola súa maternidade, e a pívot canadiense Zara Huntley.