Esforzo sen premio do Leis na cancha do líder (3-0)
Por Redacción
Bo partido sen premio do Leis Pontevedra na cancha do líder da Segunda División B de fútbol sala, o Noia (3-0).
O partido, aprazado no seu momento a petición do club local, arrincou con dominio do Noia e o Leis cun notable traballo defensivo buscando recuperar un balón para saír á contra.
Ambos os equipos gozaron de ocasións na primeira metade, pero especialmente Fiou e os paus frearon as acometidas do líder para chegar co empate inicial ao descanso.
Xa na segunda metade os de Manu Cossío non baixaron a intensidade e aos 25 minutos gozaron dunha boa oportunidade. Non acertaron na finalización e na seguinte acción o Noia rompía a igualdade nunha acción individual de Marci.
Pese ao tanto a igualdade continuou sendo máxima ata que o minuto 31, no único erro defensivo do Leis no partido, os locais facían o segundo tanto. Non se renderon os pontevedreses que gozaron de dúas claras ocasións e Cossío apostou polo xogo de cinco en busca da remontada, pero o que chegaría sería a sentenza nun roubo ao límite da falta que se converteu no terceiro tanto dos de Noia.
A derrota non permite ao Leis escapar da penúltima posición da táboa clasificatoria con 10 puntos.
DERROTAS DE LEIS E CIDADE NA SEGUNDA FEMININA
Tampouco foi boa a xornada na Segunda División Feminina, na que o Leis perdeu na cancha dun rival directo pola permanencia como o ADAE Simancas (5-2) mermado polas baixas de Lucía e Laura.
Este resultado fai que o Simancas adiante ao Leis, que agora é penúltimo do Grupo IV cos mesmo puntos, 17.
Tamén ocupa a penúltima posición, no seu caso no Grupo I, o Cidade de Pontevedra, que non é capaz de deixar atrás a súa mala serie ao perder a domicilio ante o Flavióbriga (3-0).