Sen opcións para o Súper Froiz na primeira proba da Copa España
Por Diego Espiño
A Copa España Elite e sub-23 de ciclismo, principal obxectivo da tempada do Grupo Deportivo Supermercados Froiz, empezou dando poucas opcións ao equipo alimenticio.
Na primeira das oito probas do calendario, o Circuíto Guadiana, disputado o pasado domingo na localidade estremeña de Don Benito, o equipo ruso do Lokomotiv non permitiu excesivos movementos e controlou a carreira para que o seu sprinter, Vadim Zhuravlev, puidese adxudicarse a vitoria e colocarse como primeiro líder da xeral.
Ata 70 corredores, entre eles seis do Súper Froiz, chegaron no grupo principal á liña de meta, aínda que as opcións, como recoñece Evaristo Portela, director do conxunto pontevedrés, foron practicamente nulas, "houbo escapadas pero abortáronas todas, seis dos nosos chegaron adiante pero non temos sprinters, nós estamos desexando que chegue a montaña".
O terreo do equipo alimenticio chegará xa na próxima cita, a Clásica Aiztondo, no País Vasco, "a partir de agora é outro cantar, prometemos batalla", asegura un Evaristo Portela que espera poder optar á clasificación xeral da Copa España, "en carreiras dun día é moi difícil gañar pero temos un grande equipo e confío que pelexaremos ata o final".