O Club Náutico de Pontecesures, vencedor do Nacional de Novas Promesas no Pontillón
Por Redacción
O Club Náutico de Pontecesures cumpriu este fin de semana con todos os prognósticos do Campionato de España sprint de novas promesas que se celebrou no encoro do Pontillón do Castro de Verducido e levou a vitoria na clasificación xeral de clubs cun total de 744 puntos.
A segunda posición foi para o Club Náutico Sevilla con 714 puntos e os deportistas locais tamén se meteron no podio co terceiro posto e 609 puntos do E.P. Cidade de Pontevedra. En total, tres clubs galegos entraron no top ten do campionato, sendo o terceiro As Torres, que terminou quinto con 476 puntos.
O campionato tamén pechou a clasificación da XV liga nacional de novas promesas, que quedou encabezada polo Club Náutico Sevilla con 498 puntos, pero incluíu entre os primeiros clasificado a deportistas da terra, entre eles o Club Náutico Pontecesures, con 495 puntos e a segunda posición. O Club As Torres quedou cuarto con 486 puntos e o E.P. Cidade de Pontevedra, quinto con 485 puntos.
No medalleiro, o piragüismo galego levou un total de 33 medallas, sendo o club con máis metais o Náutico Pontecesures con nove (tres de ouro, catro de prata e dúas de bronce). O E.P. Cidade de Pontevedra conseguiu seis (tres de ouro, unha de prata e dúas de bronce).