Lucía Vázquez, en plena forma antes de afrontar o Campionato de España
Por Redacción
A poucos días do Campionato de España de BTT, que se celebrará a mediados de mes na localidade ourensá de Maceda, Lucía Vázquez demostrou estar en plena forma e con ganas de pelexar polo título nacional, un dos seus grandes obxectivos da tempada.
A ciclista de vilaboa impúxose na quinta edición do BTT de Vila do Conde, en Portugal, na modalidade de Cros Country Olímpico (XCO).
A competición supoñía un test, pero a intensa calor converteu a carreira nunha proba de supervivencia máis que nun adestramento de nivel. "A temperatura corporal subiu demasiado e estiven moi mareada. Temín perder a consciencia", sinalou Lucía.
A pesar dos preto de 40 graos de temperatura que marcaba o termómetro, a pontevedresa dominou a carreira nun circuíto "moi duro e técnico" e entrou en solitario en meta tras 1 hora e 35 minutos de esforzo.
O triunfo únese aos conseguidos nas últimas semanas en Matosinhos ou no Campionato de Galicia, que reforzan a súa confianza antes dun dos momentos máis importantes da tempada.