Príncipe Felipe énchese de bailaríns co XV Trofeo Cidade de Pontevedra
Por Redacción & Diego Torrado
O pavillón Príncipe Felipe acolleu este domingo a XV edición do Trofeo de Baile Deportivo Cidade de Pontevedra, un open internacional nas modalidades de estándar e latino que reuniu a máis dun centenar de parellas.
Os participantes, procedentes de diferentes puntos de Galicia, Portugal e o resto do estado español, mostraron as súas habilidades para o baile nas diferentes categorías.
A competición, organizada pola escola de baile Pasos, estruturouse ao redor de dous bloques.
O estándar incluíu ritmos como o vals, o tango, o slow fox ou o quickstep; mentres que o latino apostou por bailes como a samba, o pasodobre, o chachachá ou a rumba bolero.
Todos eles fixeron as delicias do público que se achegou ata Príncipe Felipe para seguir as evolucións dos bailaríns, desde menores de dez anos ata as categorías sénior, con participantes de ata 65 anos.