Andrés Boullosa, bronce no Campionato de España de Sabre M-15
Por Redacción
O tirador Andrés Boullosa, da Escola Hungaresa de Esgrima, alzouse coa medalla de bronce no Campionato de España de Sabre M-15 que se disputou a pasada fin de semana na localidade madrileña de Boadilla del Monte. Pecha así a tempada no terceiro posto do ránking nacional.
O sábado celebrouse a proba de sabre individual e por equipos, onde o club pontevedrés presentaba un equipo conformado por tres tiradores (Andrés Boullosa, Pablo González e Alberto Campelo), que tamén disputaban a proba individual.
Na fase de grupos inicial, Andrés Boullosa logrou cinco vitorias e unha derrota, Pablo González catro vitorias e dúas derrotas, e Alberto Campelo tres vitorias e tres derrotas, pasando exentos o primeiro cadro de eliminación directa de 64 tiradores.
No cadro de 32 tiradores, Boullosa desfíxose con comodidade de José Garrido, de Segovia, por 15 tocados a 7. González enfrontouse ao catalán Adriá López, nun asalto moi igualado que finalizou con vitoria do pontevedrés por un axustado 15-14. Campelo caía derrotado fronte a Carlos Herranz, de Leganés, finalizando na vigésimoquinta praza da clasificación final.
Na seguinte fase, González tivo que enfrontarse ao número 1 do ránking nacional, o madrileño Alonso Santamaría. O asalto transcorreu de maneira moi igualada ata o empate a 10 tocados, onde Santamaría tomou vantaxe e venceu por 15 tocados a 10, eliminando da proba ao tirador pontevedrés, que logrou unha meritoria décimo cuarta praza.
Pola súa banda, Andrés Boullosa enfrontouse a Alejandro Ramos, de Leganés, logrando a vitoria por 15 tocados a 9. No cadro de 8 tiradores Boullosa mediuse a Álvaro Sell, de Barallas. O asalto transcorreu con vantaxe para o tirador madrileño ata que Boullosa logrou o empate a oito tocados. A partir de aí os tocados fóronse sucedendo por ambas as partes chegando ao empate a trece. Boullosa puido definir dúas accións brillantes que lle deron a vitoria e selaron o seu pase á semifinal e as medallas.
O madrileño Alonso Santamaría, que eliminara previamente a Pablo González, cruzouse, por terceira vez esta tempada, no camiño de Andrés Boullosa. Ambos chegaron moi igualados ao descanso, pero novamente Santamaría tomoulle a medida a Boullosa, ao que apeou do pase á final por un marcador final de 15 tocados a 9. Ao cabo, o madrileño acabaríase proclamando campión de España de sabre M- 15.
Na proba por equipos, o conxunto da Escola Hungaresa de Pontevedra enfrontouse en cuartos de final á Escola Hungaresa de Badalona, nun emocionante encontro que caeu ao lado dos cataláns por un único tocado (45-44) e que deixaba ao equipo lerezano no quinto posto da clasificación xeral.