Tono Campos e Diego Romero impóñense en Verducido
Por Redacción
Os regatistas do Club Breogán do Grove, Tono Campos e Diego Romero, impuxéronse aos seus rivais no Campionato Galego de Embarcacións de Equipo celebrado no encoro do Pontillón do Castro en Verducido.
A proba, disputada nas categorías K2 e C2 durante o sábado, non tivo demasiadas sorpresas xa que os principais favoritos fixéronse coa vitoria.
O Club Kayak Tudense conseguiu facerse coas tres primeiras posicións na categoría kaiak senior, sendo Gabriel Pavón e Rubén Millán a parella vencedora. Na categoría C2, tras a vitoria de Tono Campos e Diego Romero, a segunda posición foi para Sergio Vallejo e Adrián Sieiro do Club Piragüismo Poio. Este foi o último test competitivo antes da Copa de España de C1 en 1.000 metros que disputarán a próxima semana Asturias, clasificatoria para o Preolímpico de Alemaña.
O Club Breogán O Grove tamén obtivo bos resultados en categoría feminina, xa que a parella formada por Nuria Villace e Natalia García conseguiu a medalla de prata.
Doutra banda, Álvaro López e Jaime Duro da EP Ciudad de Pontevedra conseguiron a vitoria en canoa idade cadete, mentres que en xuvenís o triunfo conseguiuno a parella de Yerai García e David Mochales, do Club Piragüismo Illa de Arousa.
Tamén se disputou a competición de veteranos onde os irmáns Noya do Club Náutico Ribadumia conseguiron a medalla de ouro.
A mesma tónica seguiron as clasificacións xerais de clubs nas diferentes categorías. En categoría senior masculina a primeira posición foi para o Club Kayak Tudense, seguido do Club Piragüismo Vilaboa e do Club As torres Romaría Viquinga. O Club Breogán do Grove logrou o segundo posto na clasificación feminina, nun pódium que completaban en primeira posición o Club de Mar Ría de Aldán e en terceiro lugar o Club Kayak Tudense. En idade cadete masculina, a vitoria foi para o Ciudad de Pontevedra.