O Teucro apela ao Municipal para vencer ao Granollers e engancharse á pelexa pola permanencia
Por Diego Espiño
Pouca marxe para o erro ten a Sociedad Deportiva Teucro na visita este mércores (20:45 horas) do Granollers ao Pavillón Municipal dos Deportes.
Os azuis, a tres puntos da permanencia, necesitan gañar para achegarse aos seus principais rivais, pero en fronte terán a un "muy buen equipo", segundo defíneo Quique Domínguez, que pasa por ser un dos mellores conxuntos da competición e que chega a Pontevedra tras avanzar a cuartos de final da Copa EHF.
Con todo, non cre o técnico pontevedrés que os cataláns vaian acusar o esforzo europeo, e espera a súa mellor versión, a dun bloque "que no te perdona los errores cuando seleccionas mal el lanzamiento".
Por ese motivo o plantel teucrista apela ao espírito do Municipal, onde "hemos peleado con todos", defende Dani Hernández, e confía en dar a sorpresa porque "cuando la gente nos arropa nos sentimos cómodos y no renunciamos a nada".
Para conseguir un bo ambiente no pavillón , a directiva apostou por repetir a campaña do último partido na casa e regalar dúas entradas a cada socio.
Quique Domínguez só contará coa baixa de Iván Fernández, do que espera se recupere para viaxar a León a próxima semana, polo que volverá botar man de Carlos Gerhardt, xogador do filial.
O encontro será arbitrado polos colexiados Bustamante López e Marín Lorente.