Curto pero vital triunfo do Ribadumia (1-0) que perdoou demasiado fronte As Pontes
Por Redacción
Necesitou o Ribadumia seis xornadas consecutivas sen perder (4 triunfos e 2 empates) para despois de moito tempo abandonar os postos de descenso. Fíxoo despois de impoñerse a un As Pontes en clara costa abaixo, cunha traxectoria contraposta ao acumular tamén seis xornadas, pero neste caso logrando só un empate e cinco derrotas.
O equipo aurinegro aproveitou as derrotas de Noia e Órdenes para remontar dúas posicións na táboa e saír do descenso automático. Fixérono grazas a un gol de Hugo conseguido pouco antes do descanso, nun partido no que tiveron máis posesión de balón, dominando ao contrario, pero no que perdoaron demasiado, o que puido custarlles un desgusto se As Pontes acertase nos seus escasos achegamentos á portería.
A primeira parte foi de dominio local, pero con poucas ocasións. Hugo Jiménez acertaría no minuto 41 co gol que ao final sería definitivo.
Na segunda, o dominio local foi case unha constante, como tamén as oportunidades desperdiciadas. Nando, por dúas veces e Changui puideron ampliar a renda, pero non acertaron a sacar partido dos erros dun As Pontes que tiña en Bossa ao seu mellor home, e trataba de xogar o balón, pero sufría atrás.
Pese ao dominio local, os coruñeses rozaron o empate en dúas accións, a primeira, minuto 57, cun remate de Óscar Martínez que se foi ao traveseiro, e a segunda, minuto 66, nun cabezazo de Santi, que neutralizou Javi Sánchez.
Despois o Ribadumia volveu crear e a fallar, cunha nova ocasión clara para levar a tranquilidade á bancada, de novo por medio de Hugo, que mandou o balón en vaselina ao traveseiro, a falta de cinco minutos.
Xa no desconto os visitantes quedarían cun home menos, ao ser expulsado o seu porteiro Marcos Souto.
Consulta aquí o acta do partido.