Monte Porreiro acolle a creación da escola Futsal Pontevedra
Por Diego Espiño
O Club Deportivo Ciencias da Actividade Física e Deporte, Grupo 7 a 9 de Poio e Marín Futsal, tres proxectos vinculados de fútbol sala na comarca, presentaron a que será a súa escola de base, o Futsal Pontevedra.
Con sede en Monte Porreiro, o novo club diríxese a nenos entre os 4 e 16 anos, principalmente do barrio pontevedrés.
De feito as primeiras accións de captación de xogadores centraranse no colexio e instituto do barrio, coa idea de comezar os adestramentos durante as próximas semanas.
Ademais a escola Futsal Pontevedra terá unha sección de deporte adaptado, formando un equipo permanente coa colaboración da asociación Xuntos.
A intención da súa directiva, que encabeza Manuel Sánchez, é crecer con paso firme e involucrarse na actividade de Monte Porreiro.
Entre os proxectos en mente está converter a base en escola Inter Movistar, para o que se negocia co club madrileño.