Clara derrota do Leis femenino (6-1) na súa visita a Alcorcón
Por Redacción
O Leis non puido traer de Alcorcón un resultado positivo. As pontevedresas víronse arroiadas polas madrileñas, un dos principais equipos da Segunda División, que as derrotaron por un claro 6-1.
E iso que o Leis comezou o partido moi ben. Defendía dunha forma moi agresiva e, ademais, lograba anotar o primeiro gol do encontro. Marcábao Ali no minuto 5. Pero apenas dous minutos duraba a alegría, xa que Carolina establecía o empate a un.
A agresividade en defensa acabaría pasando ás xogadoras pontevedresas en forma de faltas. No minuto 8, o Leis poñíase con cinco faltas, o que facilitaba a saída do balón do Alcorcón e facía que chegasen con facilidade.
O bo traballo táctico das locais provocaba desaxustes defensivos no Leis, que non podía contrarrestalos con agresividade ao estar o equipo cargado de faltas. Tanto que, no minuto 15, o Alcorcón xa situara o 4-1 no marcador con goles de Leticia, Jessica e Sheila.
Á volta do descanso, o Leis tentaba presionar e saía agresivo, pero o bo xogo do Alcorcón fixo que se xerasen moitas ocasións e o partido volvíase un pouco tolo.
O punto negativo deste xogo agresivo era que o equipo se volvía a poñer con cinco faltas en pouco máis de 10 minutos, o que facía máis difícil o traballo de presión das visitantes.
Nos últimos minutos, as pontevedresas optaron pola táctica da porteira-xogadora, algo que aproveitou o Alcorcón para ampliar a súa vantaxe e establecer o 6-1 final.
Con esta derrota, o Leis queda na décima posición da táboa con tres puntos.