O Villalonga, máis líder tras gañar (3-2) o Valladares e a derrota do Céltiga (1-0) en Sanxenxo
Por Redacción
Tres vitorias e dúas derrotas, unha delas obrigada ao xogarse un derbi. É o balance dos equipos do Salnés nunha nova xornada, a novena, no grupo sur da Preferente Galicia.
O triunfo máis importante é o do Villalonga. Tras o tropezo da pasada semana, os celestes volveron ao bo camiño. Aumenta a cinco puntos a súa vantaxe co segundo clasificado tras derrotar por 3-2 ao Valladares en San Pedro. Para iso, tivo que sufrir porque os vigueses colocáronse cun 0-2 no minuto 35. Tres goles na segunda parte, anotados por Diego Blanco, Pablo Porta e Renda, permitiron que os tres puntos quedasen en casa.
Tamén gañou en casa o Sanxenxo, no seu caso, ao Céltiga por un gol a cero. Un solitario tanto de Cristóbal de falta directa, no minuto 24 da primeira parte, permitiulles derrotar aos da Illa que, con todo, pelexaron ata o final polo empate. Un gran Vladi baixo os paus da portería local impediu que se escapase algún punto. Con este resultado, o Sanxenxo suma trece puntos e o Céltiga queda cos dezasete que tiña, agora cuartos na táboa.
O USD O Grove sumou tres puntos, no seu caso, a domicilio. Venceron por 1-2 no campo do Atios. A pesar de que os locais trataron de controlar o balón desde o primeiro minuto, a iniciativa foi sempre o conxunto meco. Félix, no minuto 10, poñía o 0-1 no marcador, e o segundo gol visitante chegaba por medio de Nel, a tres minutos do final, despois de que Jorge Fernández empatase ao principio da segunda parte. Os do Grove teñen xa doce puntos.
A cruz da xornada foi o Portonovo. Os homes de Luís Oliveira saíron goleados de Ponteareas, tras caer por 5-0 ante o Cultural de Areas. A efectividade ofensiva dos locais, que marcaron o primeiro gol xa no minuto 2, foi decisiva ante un Portonovo que se viu desbordado unha e outra vez polo ataque do rival. Con esta derrota, cae ata a oitava praza da clasificación con catorce puntos.