O fútbol sala, unha terapia efectiva para a saúde mental
Por Diego Espiño & Mónica Patxot
O pavillón da Cidade Infantil Príncipe Felipe foi escenario durante a mañá deste xoves dun torneo deportivo diferente.
O II Torneo Puntapé, organizado pola Asociación Alba, reuniu aos equipos de tres asociacións da provincia para celebrar o Día Mundial da Saúde Mental (10 de outubro) dun xeito lúdico e deportivo.
Ademais da Asociación Alba, estaban representadas as asociacións Lenda (Redondela) e Lar (Vilagarcía), todas elas integradas na Federación de asociacións de familiares e persoas con enfermidade mental de Galicia (FEAFES).
O obxectivo non é outro que usar o fútbol sala como unha ferramenta coa que "mellorar na calidade de vida, facer compañeiros e amigos", explican dende Alba.
"Tratar de intentar que estean integrados dentro dunha competición deportiva que favoreza as relacións", completou Germán Igrexas, representante da asociación.
O Torneo Puntapé organizouse por primeira vez hai nove anos, derivando nunha liga a nivel galego entre os diferentes colectivos integrados en FEAFES que se disputa agora de xeito regular.