Tres medallas de prata para a Escola Hungaresa no Criterium Nacional de Esgrima M-10 e M-12
Por Redacción
Os deportistas máis novos da Escola Hungaresa veñen empuxando forte, segundo o demostrado no último Criterium Nacional de Esgrima para as categorías alevín e benxamín.
Na localidade madrileña de Leganés o club pontevedrés sumou tres medallas de prata, nunha competición na que participou con catro tiradores en sabre masculino alevín, dous tiradores en sabre masculino benxamín e unha tiradora en sabre feminino benxamín.
Aínda que non puido revalidar o seu título nacional, Boris Bunimov protagonizou un grande torneo accedendo á final de sabre masculino alevín, tras sumar seis vitorias e unha derrota na fase de grupos. No enfrontamento definitivo Boris cedeu ante Juan Corbi, do Club de Esgrima Dinamo de Valencia, por 10 tocados a 9.
Na mesma categoría Alexandre Casal, Miguel Jamardo e Jorge Docal non lograron superar a fase de grupos, terminando nas posicións 16, 20 e 21 respectivamente.
En sabre benxamín chegaron as outras dúas medallas de prata por medio de Lucas Campos, que perdeu na final ante Gonzalo Fernández (Club Esgrima Barajas) por 10 tocados a 6, e de Pilar Garnelo, que non puido con Candela Mestre (Club Esgrima Barajas) ao ceder por 10 a 9.
Tamén participou nesta categoría Juan Ocampo, acabando décimo sexto.
Estes resultados supoñen un broche de ouro á tempada da Escola Hungaresa á espera de que o seu tirador Pablo Moreno participe, entre os días 15 e 22 de xullo, no Campionato do Mundo Senior en Moscú.