Manuel Abalo reconsidera a súa postura e preséntase como candidato para seguir presidindo o Arosa
Por Redacción
O prazo para presentar candidaturas para presidir o Arosa SC finaliza o venres ás 20:00 horas, hora na que se fixou a primeira convocatoria dunha asemblea de socios clave no club arlequinado.
Nun principio a asemblea ía supoñer o traspaso de poderes de Manuel Abalo na presidencia, toda vez que o aínda dirixente anunciara a súa intención de abandonar a entidade.
Non obstante, a ausencia ata o momento de candidatos e a petición dalgúns socios e patrocinadores fixo que Abalo reconsiderase a súa postura.
"Son moitas cousas, dáme medo que os principais patrocinadores do club cumpran a súa advertencia e deixen de colaborar se nos imos", explica o presidente arosista nun comunicado, no que asegura tamén que hai xente disposta a colaborar co club se existe continuidade.
A asemblea de socios celebrarase este venres no salón de plenos de Ravella con dous únicos puntos na orde do día: a presentación das candidaturas e a elección de presidente.