Repartición de puntos (0-0) na Lomba que afasta a Arosa e Alondras dos postos de honra
Por Redacción
A falta de acerto no remate levou a Arosa e Alondras a unha repartición de puntos que afasta un pouco ambos os dous dos postos de honra, nun partido condicionado polo mal estado do terreo de xogo da Lomba.
Superioridade das defensas sobre os ataques, cun Arosa que dominou o primeiro tempo, pero que viu alterados os seus plans cando Piscis se viu obrigado a substituír antes do descanso o seu mellor home na medular, Yago Pérez, ao resentirse da súa lesión.
Eloy, Adrián Camiño e de novo Eloy, levaron o perigo á área visitante, especialmente nunha segunda parte moito máis movida, mentres o Alondras dominaba territorialmente pero sen crear perigo ante a meta de Jorge Pérez, que reaparecía nos vilagarcianos.
Os últimos quince minutos viron as ocasións máis claras, pero Martín evitou o gol en senllos remates de Javi Pazos e Eloy, mentres o Alondras puido marcar nun remate de Abel á saída dun corner, que marchou alto, e especialmente nunha falta na frontal que sacou Leiro sobre Gustavo Souto, pero o dianteiro visitante perdoou ante Jorge Pérez. Aínda habería tempo para unha última ocasión arlequinada, nunha falta lateral lanzada por Adrián Camiño que rematou de cabeza Rivas sen encontrar portaría.
AROSA SC (0): Jorge Pérez; Juanjo, Juan, Pablo Rivas, Álex Freire; Vixo, Yago Pérez (Esteban Capelo, min. 39); Nando (Javi Pazos, min. 55), Adrián Camiño, Eloy; e Quique Cubas.
ALONDRAS CF (0): Martín; Casti, Rubén, Toni, Javi, Iván (Abel, min. 46); Pablo Berros (Berto, min. 76), Leiro, Joni, Firi; e Richi (Gustavo Souto, min. 60).
Árbitro: Manuel Casanova Cudeiro (Ourense), auxiliado nas bandas por José Ramón Jiménez Alberte e Abraham Pérez Dapia. Amoestou a Pablo Rivas, Álex Freire, Esteban Capelo e Juan Rodríguez, polos locais e a Javi e Casti polo Labercas.
Incidencias: Campo Municipal da Lomba (Vilagarcía de Arousa). Uns 500 espectadores.