BM Pontevedra paga coa derrota (19-26) a súa mala primeira parte ante o BM Chapela
Por Redacción
As posibilidades do BM Pontevedra de sorprender ao BM Chapela pasaban por saír moi concentrados dende o comezo, pero non o conseguiron. Os de Ramón Pazos fixeron unha mala primeira parte en ataque, na que só lograron seis goles, e dependeron en exceso do acerto de Álex Pombo (autor de 11 dos 19 goles do seu equipo), o que non foi suficiente para facer dano ao equipo de Frank Teixeira.
O Chapela foi sempre por diante no marcador, pero rompeu o partido cun demoledor parcial de 0-7 entre os minutos 12 e 27 da primeira parte, deixando aos pontevedreses máis de 15 minutos sen anotar, para poñer un 4-12 no luminoso que facía pouco menos que imposible calquera esperanza de remontada.
A pesar de todo, intentouno BM Pontevedra na segunda parte, na que mellorou o seu xogo chegando a situarse a só dous goles de desvantaxe, pero o Chapela non se deixou sorprender e volveu abrir brecha na recta final para levarse unha vitoria cómoda.
BM PONTEVEDRA (19): Santi Picallo, Ángel Noya, David Lagoa; Ansias, Santi Calvo (2), Domato, Gonzalo García, Gonzalo Eloy (2), Álex Pombo (11), Fernando Rey (2), Iago Rodríguez, Alberto Santiago (2), Ángel Soliño e Javier Suárez.
BM CHAPELA (26): Suso Soliño, Daniel González; Adrián Blanco, Javier Carrera (3), Pablo Casal (3), Chema Cid (3), Cuadrado (11), Escudero (1), Enrique Fernández (1), Rubén Gómez, Fabián (1), Daniel González, López Tarazaga (3), Ángel Martínez e Miguel Sío.
Árbitros: Fernando López Fernández e David Aja García (Cantabria). Excluíron por dous minutos a Santi Calvo, Álex Pombo e Alberto Santiago, polos locais, e a Pablo Casal, Rubén Gómez (2) e Ángel Martínez, polo Chapela.
Marcador (cada cinco minutos): 0-1, 2-3, 4-6, 4-7, 4-11, 6-12 (descanso), 10-14, 13-16, 15-18, 16-19, 18-22 e 19-26 (final).
Incidencias: Pavillón Municipal dos Deportes (Pontevedra). Uns 200 espectadores.