O Pontevedra Rugby Club cae na casa (0-18) contra un gran Campus Ourense
Por Redacción
Non foi un bo fin de semana para o equipo senior do Pontevedra Rugby Club. Caeron claramente ante un equipo que está a demostrar un rápido crecemento, o Campus Ourense. Perderon por 0-18 nun encontro disputado no campo de rugby de Monte Porreiro.
O encontro empezou moi igualado e os dous equipos tiveron as súas opcións. Defendían con forza, dando un grande espectáculo e parecían estar bastante entoados en ataque. De feito, o primeiro ensaio anotouno o Pontevedra Rugby Club a través de Chema Fernández, pero o árbitro non o apreciou e, a partir de aí, cambiou a dinámica do partido.
O propio Chema Fernández caía lesionado, como tamén minutos antes lle pasara ao primeiro centro, "Wachu". A falta dun minuto para o final da primeira parte, o Campus Ourense anotaba o primeiro ensaio e rompía o partido.
Na segunda parte, con desvantaxe de campo para os pontevedreses que tiveron que xogar co sol de fronte, os ourensanos levaron a iniciativa, afastando o perigo do seu campo con patadas longas e mostrando un ataque moi forte ante o que os pontevedreses se esforzaban por controlar en defensa. Pero a pesar diso, non lograron frear o seu rival que seguiu ampliando a súa vantaxe.
En dúas semanas, o Pontevedra Rugby Club recibirá a visita do líder da Primeira División galega, os Ingleses de Vilagarcía.