Dolorosa derrota do Leis feminino, que cae na casa (1-2) ante o Fisober FSF
Por Redacción
Paso atrás do Leis nas súas aspiracións de manter a súa praza na Segunda División feminina de fútbol sala. Visitaba o Pavillón Municipal pontevedrés un dos seus rivais directos, o FSF Fisober, un equipo que aínda non lograra ningunha vitoria na tempada. E logrouna precisamente en Pontevedra, ao impoñerse ao equipo local por un axustado 1-2.
O Leis sabía da importancia deste partido e por iso, dende o primeiro minuto, intentou despregar unha presión asfixiante en toda a pista para evitar o progreso do seu rival cara á portaría pontevedresa. Pero un disparo afastado de María no minuto 3 daba o primeiro gol ás de Vimianzo.
Tras o gol, o equipo de David Muñoz intentou buscar o empate, creando ocasións nas que nin Anita, nin Carmen, nin Mar lograban bater á porteira visitante. E cando todo parecía que se ía chegar ao descanso co 0-1, Inés anotaba o segundo do seu equipo tras un saque de esquina que rebota en varias compañeiras.
Na segunda parte, o partido complicouselle aínda máis para o Leis coa expulsión de Bibi no minuto 24 por dobre amarela. Pero unha inspirada Helena logrou manter o seu equipo no partido.
Cos dous equipos en igualdade de condicións, ao ser expulsada tamén Myrella por parte do Fisober, sucedéronse as oportunidades de gol das pontevedresas, que mesmo chegaron a gozar de tres lanzamentos dende os 10 metros, detidos todos eles por Leti. O gol pontevedrés chegaría no minuto 37 por medio de Patri, pero nos últimos instantes do encontro, o Leis aínda que o intentou non logrou asinar polo menos o empate.
LEIS PONTEVEDRA (1): Tami, Anita, Bibi, Sofi, Marta - cinco inicial-, Helena, Mar, Loló, Bea, Patri e Carmen.
FISOBER FSF (2): Leti, María, Inés, Ana, Myrella -cinco inicial-, Noelia, Raquel e Laura.
Goles: (0-1) María, minuto 1. (0-2) Inés, minuto 19. (1-2) Patri, minuto 37.
Incidencias: Partido disputado no Pavillón Municipal dos Deportes de Pontevedra