Cómoda vitoria ante o Barco (4-1) dun Portonovo que se afianza no liderado de Preferente
Por Redacción
Tras cinco partidos sen gañar, o Portonovo reencontrouse este domingo coa vitoria. E fíxoo de forma incontestable. Derrotou por 4-1 ao Barco, terceiro clasificado, grazas aos goles -por partida dobre- de Nacho e Hugo Soto.
O equipo de Luis Oliveira imprimiu ao partido un ritmo moi alto dende o primeiro minuto. Fíxose dono do campo e apenas deixou opcións ao seu rival. Tanto, que á media hora de xogo o marcador reflectía xa un 3-0.
O primeiro gol, obra de Nacho, chegaba aos dous minutos do partido tras un saque de esquina. Cando se superara o primeiro cuarto hora, Álex Cubas caía derrubado na área ourensana. O árbitro non dubidou en sinalar o penalti, transformado posteriormente por Hugo Soto. E o terceiro, cun Barco incapaz de conter o xogo local, anotábao de novo Nacho tras un gran centro de Luis Alberto.
O Portonovo encontrábase moi cómodo sobre o céspede e, tras o descanso, seguiu dominando o partido, aínda que a tranquilidade do 3-0 lle fixo xogar con máis tranquilidade. Iso permitiulle ao Barco acurtar distancias no minuto 57 cun gol de Carlos. Pero Hugo Soto, pouco a pouco, facía o 4-1 definitivo tras superar a Macías, porteiro visitante, nun man a man.
Con esta vitoria, o Portonovo mantén o liderado da Rexional Preferente. Suma 30 puntos e deixa ao Barco, terceiro, cinco puntos.
PORTONOVO SD (4): Dani, Dopazo, Gándara, Suso Bea, Agra, Álex Cubas (Manu Sieiro, minuto 75), Víctor, Nacho (Pablo Blanco, minut 83), Brian, Luis Alberto (César, minuto 81) e Hugo Soto (Berto, minuto 85).
CD BARCO (1): Macía, Brais (Carlos Quintana, minuto 56), Recaman, Borja (Gerónimo, minuto 78), Daniel, Diego, Carlos (Marcos Rivero, minuto 62), Guntiñas (Adrián, minuto 46), Pablo, Jorge Lamas e Rodrigo (Dani Arias, minuto 73).
Árbitro: Mosquera Goce, auxiliado nas bandas por Álvarez Domínguez e Dávila Fernández. Amoestou aos locais Luis Alberto, Hugo Soto e Nacho e aos visitantes Diego, Jorge Lamas e Pablo. Este último foi expulsado por dobre cartón vermello no minuto 72.
Goles: (1-0) Nacho, minuto 2. (2-0) Hugo Soto de penalti, minuto 15. (3-0) Nacho, minuto 27. (3-1) Carlos, minuto 57. (4-1) Hugo Soto, minuto 70.
Incidencias: Partido disputado no campo de Baltar (Portonovo).