O torneo ITF de tenis do Mercantil contará con algunhas das mellores raquetas internacionais en idade júnior
Por Diego Espiño
Cunha cifra de inscrición record, con 513 peticións de 44 países, o Torneo Internacional de Tenis ITF de Pontevedra chega á súa terceira edición no Casino Mercantil pensando en subir de categoría en próximas edicións.
Actualmente a cita, que terá lugar este ano entre os días 12 e 19 de outubro, está catalogada como Nivel 3 dentro do circuíto pero pretende ascender para situarse un chanzo por debaixo dos catro Grand Slam, torneos júniors que se disputan paralelamente aos profesionais en Australia, Roland Garros, Wimbledon e US Open.
De momento o nivel da presente edición non ten nada que envexar a outras citas de maior nivel no calendario, pois está confirmada a presenza dos mellores xogadores españois desta categoría, os incluídos no Centro de Alto Rendemento da Federación Española, e algúns das raquetas internacionais máis prometedoras.
Así, segundo confirmou o director do ITF de Pontevedra, Noli Álvarez, nas pistas do Mercantil estarán os nacionais Eduard Guell e Álvaro López, actuais 83 e 116 do ranking nacional absoluto en categoría masculina, ou o portugués Felipe Cunha, fillo dun ex-tenista profesional luso e que destaca nas categorías inferiores do país veciño.
No cadro feminino estará a principal raqueta júnior española Eva Guerrero, actual número 56 do ranking nacional absoluto, ou as rusas Anna Blinkova e Daria Kruzhkova.
Como exemplo do nivel da presente edición Álvarez cita o caso da actual campioa de España cadete e júnior, Cristina Bucsa, que "está en la fase previa, y eso indica el nivel del torneo".
A fase previa xogarase o domingo 12 e luns 13, con 32 xogadores por cadro, feminino e masculino, mentres o martes 14 será a quenda do cadro final, co mesmo número de deportistas.
As finais de dobres están previstas para a tarde do sábado 18 e as individuais para a mañá do domingo 19, coa novidade de que os gañadores individuais gañarán unha bolsa dun ano para adestrar e estudar en Estados Unidos, mentres os finalistas contarán cun financiamento do 50% en virtude do acordo asinado coa empresa Verdasco Taracido.
A entrada nas instalacións do Casino Mercantil será de balde para o público.