Lete Lasa: "Algún de vós pode ser o relevo de David Cal"
Por Ramiro Espiño
Auditorio cheo. Profesores, adestradores e alumnos do Centro Galego de Tecnificación Deportiva esperaban a presentación do libro escrito por Suso Morlán: "David Cal, 100 días para a historia". Un acto presidido polo secretario xeral para o Deporte da Xunta, José Ramón Lete Lasa, a quen flanqueaban David Cal e o autor do libro, o seu adestrador, Suso Morlán, xunto a directora do centro, Elena Fernández. Entre o público, ademais dos pais do propio Suso, rostros coñecidos como o de Omar González, adestrador de Javi Gómez Noya, Santi Ferrer ou o médico do Centro, Fernando Huelín.
Suso e David volvían ás súas orixes, ao sitio onde hai anos se comezou a forxar a lenda do máximo medallista olímpico español. Os dous recordaron o seu paso polo centro e exhortaron os alumnos a esforzarse para alcanzar as máis altas metas, poñendo o acento en que tamén dende Pontevedra se pode chegar a ser o mellor do mundo, que medios e coñecementos hai para logralo.
Antes, Lete Lasa, nas súas palabras de presentación dirixírase especialmente aos alumnos das diferentes modalidades deportivas dicíndoos que "quizais algún de vós sexa o relevo de David". Avanzou que o libro será editado en galego e se lle fará chegar un exemplar a cada un dos alumnos do Centro.
Igualmente fixo público o compromiso de Suso Morlán de enviar á secretaría xeral o seu programa de adestramento de todo o ciclo olímpico para trasladalo ás universidades de Galicia. "Queremos que ou teu coñecemento chegue ás universidades galegas. Os adestradores actuais e do futuro deben coñecer un modelo de indubidable éxito", resaltou.
Ademais, o secretario xeral para o Deporte reiterou a David Cal o apoio incondicional da Xunta de Galicia para Río 2016. "En Galicia terás todo o que necesites para ir a Río. A Xunta de Galicia, o deporte galego, estará contigo", asegurouno Lete ao deportista español con máis medallas olímpicas.
Este apoio institucional á preparación de deportistas como David Cal e, de forma extensiva, a todo o deporte galego de alta competición, canalizarase a través do programa Galicia-Río 2016, mediante a posta en marcha de accións de formación avanzada para que os adestradores dos mellores deportistas galegos transmitan os seus coñecementos a todos os técnicos deportivos de Galicia.
Por último, Lete Lasa anunciou que na lexislatura que comeza o Centro Galego de Tecnificación Deportiva recibirá un importante pulo para abrirse á universidade e á investigación. "O CGTD será ou centro de excelencia deportiva de Galicia", resaltou.