Máis de 200 xogadores tomarán parte no XVI Torneo Internacional Tenis de Mesa Monte Porreiro
Por Redacción
Este sábado 13 de setembro e domingo 14 daranse cita en Pontevedra "los mejores jugadores de Galicia, nacionales y extranjeros, y también de Portugal" de tenis de mesa, segundo asegura o presidente do Monte Porreiro, Lucho Álvarez.
O motivo é a celebración, por décimo sexto ano, do Torneo Internacional Tenis de Mesa Monte Porreiro, que terá lugar no pavillón de Príncipe Felipe.
Máis de 200 xogadores daranse cita na competición, que arrancará ás 9:30 horas do sábado coas categorías inferiores e os xogadores veteranos.
Para o domingo quedará o torneo absoluto, dende a mesma hora, todo iso con entrada de balde para o público.
O torneo foi presentado este mércores na Deputación Provincial coa presenza da deputada Ana Isabel Vázquez, o alcalde de Pontevedra, Miguel Anxo Fernández Lores, o concelleiro de Deportes, Agustín Fernández, e o presidente do Tenis de Mesa Monte Porreiro, Lucho Álvarez.