Marathon, Tenerife e Universidad de Oviedo, primeiros rivais da Gimnástica
Por Redacción
A oitava tempada consecutiva do equipo masculino da Sociedad Gimnástica en División de Honra, terá o seu punto de partida na localidade madrileña de Alcobendas.
A Real Federación Española de Atletismo confirmou as sedes da primeira xornada das ligas nacionais e o club pontevedrés competirá no Grupo C, o sábado 17 de maio, en sesión vespertina, tendo como rivais o Marathon, Tenerife Cajacanarias e Universidad de Oviedo.
Ademais, celebrarase conxuntamente o encontro correspondente ao grupo D da División de Honra feminina, onde está o outro equipo galego que milita na máxima categoría, o Ría de Ferrol.
O domingo 18 de maio, pola mañá, celebraranse os encontros da Primeira División, tamén en Madrid, concretamente en Alcorcón, as rapazas do Lucus e o Feminino Celta, competirán no Grupo B da División de prata, e en Cáceres os rapaces do Celta de Vigo teñen un alcanzable Grupo D.
Tradicionalmente as ligas nacionais comezaban o último fin de semana de abril, pero este ano a RFEA decidiu atrasar o comezo da competición, co obxectivo de que as xornadas finais estean máis preto dos Campionatos de España individuais, que é cando os atletas están en mellor forma.
O Polideportivo de Alcobendas é unha pista moi coñecida por todo o atletismo, xa que leva dous anos sendo a sede do Campionato de España absoluto e en 2014, volverá a selo.