Gómez Noya inicia a súa tempada en Nova Zelandia
Por Redacción
New Plymouth (Nova Zelandia) será a primeira parada da tempada dentro do calendario ITU para Javier Gómez Noya, na que supón a segunda cita da Copa do Mundo de Tríatlon.
O deportistas ferrolano afincado en Pontevedra inicia así oficialmente un ano no que aspira a repetir o seu brillante título nas Series Mundiais, así como facer un bo papel no Campionato do Mundo de Dúatlon que se disputará na cidade de Lérez.
Gómez Noya, que leva un mes concentrado no país oceánico, foi vencedor da última Copa do Mundo celebrada en New Plymouth, no ano 2008.
Entre os seus competidores directos nesta carreira sitúase o tamén español Mario Mola, gañador en Mooloolaba nunha proba na que tamén participou o pontevedrés Pablo Dapena, e triatletas como Joao Silva, Sven Riederer ou Laurent Vidal.
Xunto a eles tamén estará outro deportista que se adestra habitualmente no Centro Galego de Tecnificación Deportiva de Pontevedra, Fernando Alarza.
A proba de New Plymouth disputarase na modalidade de sprint (750 metros de natación, 20 quilómetros de ciclismo e 5 de carreira a pé) na madrugada de sábado a domingo.