Paso de xigante do Poio FS cara á permanencia ao gañar (2-0) ao Lacturale Gurpea Orvina
Por Redacción
Un rival menos e un só posto de descenso por adxudicar. A vitoria do Poio FS sobre o Lacturale Gurpea Orvina significa alcanzar os 25 puntos, deixar ás navarras a 14 de distancia máis o golaverage parcial a falta de só nove xornadas por disputar, e a oito puntos do Valdetires Ferrol, que agora ocupa o antepenúltimo posto da táboa, marcando a liña da permanencia.
Paso de xigante, polo tanto, das rapazas de Marcio Santos para conseguir o obxectivo nesta primeira tempada na máxima categoría do fútbol salga feminino, pero vitoria traballada e difícil fronte a un equipo como o navarro que se xogaba moito para intentar abandonar as posicións de descenso.
Os dous conxuntos saíron conscientes da importancia dos puntos en disputa, o que propiciou un partido tenso e disputado ata o último instante. Despois duns primeiros minutos de relativa igualdade, o Poio fíxose co control do xogo, pero non acertou a aproveitar as súas ocasións ante a meta rival, cun Lacturale parapetado atrás, que confiaba a súa sorte á posibilidade de sorprender nunha contra.
Pouco faltaba para o descanso cando Kiko conseguía por fin romper o muro navarro, facendo subir o primeiro gol ao marcador, que encarrilaba o partido.
Non obstante as navarras reaccionaron na segunda parte, pero sen acertar ante a portaría de Silvia. Pola súa banda o Poio buscaba a sentenza, pero tivo que sufrir ata o último suspiro, cando o Lacturale, con xogo de cinco, buscaba a igualada á desesperada e se encontrou cunha perda de balón que permitiu a Claudia facer o 2-0 definitiva nun remate dende metade de pista, a porta baleira.
POIO FS (2): Silvia; Charo, Claudia, Ceci, Kiko -cinco inicial-, Yoly, Peke e Elena.
LACTURALE GURPEA ORVINA (0): Rebeca; Sandra Soto, Maialen, Jéssica Tena, Maite -cinco inicial-, Fabiola, Irune, Cristina e Bea Garde.
Árbitros: Vázquez Castellanos e Crestelo Blanco (Colexio galego). Amoestaron Kiko e Ceci, o o Poio FS, e a Maite e Jéssica, polo cadro navarro.
Goles: (1-0) Minuto 19: Kiko. (2-0) Minuto 40: Claudia.
Incidencias: Pavillón Municipal da Seca (Poio). Cheo cuns 600 espectadores.