Lucía Vázquez inicia a súa defensa do Open de España de mountain bike
Por Redacción
A rider de Vilaboa Lucía Vázquez inicia este domingo en Valladolid a súa participación no Open de España de mountain bike, proba na que defende o título logrado o pasado ano.
Tras abrir a tempada cun noveno posto na Copa Catalana Internacional de Banyolas, Lucía recoñece chegar á cita curta de preparación: "Aínda non estou ao meu mellor nivel, creo que o meu mellor pico de forma será nos meses de maio e xuño. Ogallá poida gañar a proba do domingo pero creo que non será doado".
A xefa de filas do Vicma Bike Team cre que os seus principais rivais será a subcampiona da pasada edición, Sandra Santanyes, e Anna Villar.
Ademais de intentar repetir éxito no Open de España, Lucía Vázquez marcouse outros obxectivos ambiciosos para a tempada, como ser seleccionada polo equipo nacional para o Europeo ou o Mundial da especialidade e lograr un bo resultado nalgunha das probas internacionais.
O MTB Ciudad de Valladolid é a primeira das cinco carreiras puntuables para o Open de España Cofidis.