O Baxi Ferrol non dá opción ao Arxil nas semifinais de Copa Galicia (47-90)
Por Diego Espiño & Mónica Patxot
Posta de longo do novo proxecto deportivo do Club Baloncesto Arxil, mirando cara á súa estrea na Liga Feminina Challenge, con derrota nas semifinais da Copa Galicia.
O equipo dirixido por Marita Janeiro afrontaba no torneo autonómico o seu primeiro test de pretempada, e facíao fronte a un rival de moita entidade como o Baxi Ferrol, consolidado como un dos equipos importantes da máxima categoría nacional.
A cita, que se disputaba no Pavillón Municipal dos Deportes como un dos eventos previstos na 'semana fantástica' de baloncesto na Boa Vila, chegaba pronto para as pontevedresas, aínda con poucos adestramentos ás súas costas.
Esa falta de ritmo fíxose notar xa desde o inicio, cun rápido 2-11 en apenas dous minutos para o conxunto visitante que marcaba xa a tendencia desde os primeiros compases. Pedía tempo morto o Arxil para conter o torrente ofensivo do seu rival, pero o marcador se disparaba ata un contundente 8-27 ao termo do primeiro cuarto.
No segundo parcial seguía custando moito anotar e o Baxi controlaba o encontro para ampliar a súa renda ao tempo de descanso (19-48).
Con xa todo decidido e sen presión, mellorou o Arxil tras o paso por vestiarios para reducir lixeiramente a desvantaxe (36-67), pero o Uni Ferrol volveu apertar o acelerador nos últimos 10 minutos para pechar a semifinal cun claro 47-90 ao seu favor.
Relacionadas:
-
Emotiva xornada de baloncesto para honrar a Maite Méndez
Por Almu Dapena & Cristina Saiz |
-
Perfumerías Avenida e Ensino de Lugo, convidados de luxo para o I Memorial Maite Méndez
Por Diego Espiño |
-
O Arxil de Liga Feminina Challenge ponse en marcha
Por Diego Espiño & Mónica Patxot |
-
Como unha conversación nun bar transformou o baloncesto feminino en Pontevedra
Por Almu Dapena & Cristina Saiz |
-
A internacional portuguesa Raquel Laneiro, guinda para o proxecto do Arxil en LF Challenge
Por Diego Espiño |
-
A base Laura Fernández, primeira fichaxe do Arxil
Por Redacción |